Գրադարանավարի օրվա առթիվ ՀԱԱՀ գիտական գրադարանը բացել էր «Գանձարանի դռները»
Գրադարանավարի օրվա առթիվ գրադարանն այսօր՝ հոկտեմբերի 7-ին, առաջին անգամ բացել էր իր գանձատան դռները՝ ցուցադրելու բազմալեզու հնատիպ գրքերի և ամսագրերի հարուստ ֆոնդի (ավելի քան 3500 անուն) մի փոքր մասը: Գրադարանի ամենահին գիրքը 238 տարեկան է՝ տպագրված 1781թ. :
Գրադարանի հյուրընկալ հարկի տակ էին հավաքվել համալսարանի դասախոսներ և տարբեր ստորաբաժանումների աշխատակիցներ՝ ծանոթանալու ցուցադրված հնատիպ գրականությանը և մասնագիտական տոնի առթիվ շնորհավորելու գրադարանային գործի նվիրյալներին, արժևորելու նրանց անխոնջ աշխատանքը:
ՀԱԱՀ ռեկտորի անունից շնորհավորանքի խոսք ասաց գիտական աշխատանքների գծով պրոռեկտոր Հրաչյա Ծպնեցյանը՝ շեշտելով գրադարանավարի աշխատանքի կարևորությունը, մանավանդ՝ տեղեկատվական տեխնոլոգիաների զարգացման պայմաններում: «ՀԱԱՀ գրադարանը պատվով է կատարում իր առջև դրված խնդիրները, պահպանում ոչ միայն
գրադարանային համակարգի լավագույն ավանդույթները, այլև կիրառում գրադարանային գործի ժամանակակից ձևերն ու տեղեկատվական տեխնոլոգիաները, ցուցաբերում ստեղծագործական մոտեցում աշխատանքի նկատմամբ: Բուհի գրադարանը միայն գրքերի պահոց չէ, այլև ուսանողների հետ գործակցության շնորհիվ՝ վերջիններիս աշխարհայացքի ձևավորման, օգտակար միջոցառումների կազմակերպման կենտրոն, նաև՝ ընթերցողի և հեղինակի միջև «երկխոսության» միջավայր»,- նշեց պարոն Ծպնեցյանը: Պրոռեկտոր Ծպնեցյանը շնորհակալագրեր հանձնեց ՀԱԱՀ-ի գիտական գրադարանի աշխատակիցներ Լիլիթ Վարդանյանին, Ջուլետտա Թորոսյանին և Հռիփսիմե Ալեքսանյանին: Շնորհավորանքի խոսքեր ասացին նաև 
ՀԱԱՀ արհկոմիտեի նախագահ Աննա Աղաջանյանը, տարբեր ամբիոնների դասախոսներ:
Գիտական գրադարանի վարիչի պաշտոնակատար Հասմիկ Ադամյանը՝ շնորհավորելով գործընկերների մասնագիտական տոնը, անդրադարձավ համալսարանի գրադարանի ձեռքբերումներին: Այսօր բուհի գիտական գրադարանն իրականացնում է նաև էլեկտրոնային սպասարկում՝ KOHA համակարգով:
Հաշվի առնելով , որ ՀԱԱՀ գրադարանը ՀՀ ագրարային ոլորտի միակ գրադարանն է, բուհի ղեկավարությունը հնարավորություն է ընձեռել library.anau.am էլեկտրոնային գրադարանից օգտվելու ոչ միայն ագրարային համալսարանի դասախոսներին և ուսանողներին, այլև բոլոր ցանկացողներին: Դրա շնորհիվ Էլեկտրոնային գրադարանի այցելուների թիվը տարեկան կազմում է շուրջ 390.000:
Գրականության ամենօրյա խնամք ու պահպանում, նոր գրականությամբ ֆոնդի համալրում, համակարգում, մշակում և թվայնացում, գրացուցակների ստեղծում, ընթերցողների սպասարկում: Առաջին հայացքից չնկատվող, բայց հսկայածավալ աշխատանք, որն անձնվիրաբար իրականացնում են ՀԱԱՀ գիտական գրադարանի 25 աշխատակիցները:
Հնատիպ գրականության ցուցադրությունը կշարունակվի ևս մեկ շաբաթ։
ՀԱԱՀ գրադարանի ֆոնդում առկա հնատիպ գրականության ցուցակին ծանոթանալու համար սեղմեք հետևյալ հղումը